Text mit dem Namen: Guggemuusig Ohregribler Gruppenfoto der Guggemuusig Ohregribler im Stamm am Fasnachtsdienstag

Gschicht vo de Ohregribler

Stammkostüm der Guggemuusig Ohregribler

Vor-e-me vierlig Johrhundert hett e' Hampfle Waagefasnächtler vo dr' Chropf Clique Rieche nääbe-n-em ummefahre d' Fasnacht no anders fyyre welle. Im Cliquemagazin sin divärsi Instrumänt umme g'schtande. Gly hett me g'meint, worum nit als Gugge schränze?

Ohni Namme und mit nur 12 Fasnächtler hett's Aabentyyr -Guggefasnacht- also Zischtig 1974 uff em Claraplatz a'gfange. Die muusikalisch Zämmesetzig isch ebbe gnau so b'scheide gsi wie's Repertoire und wo zue vorgruggter Nachtschtund die erschte Gehversuech gligglig beändet worde sin, hän alli gwisst, mir wärde e richtigi Gugge.

Im Juni noo däre Fasnacht sin denn d' Ohregribler grindet worde und bereits noo drei Johr sin mer's erscht Mool im Harlekin gloffe. Unzähligi Ufftritt, wie am FG-Oobe, im Drummeli, Charivari und Mimösli zelle glyych zue de Hehepinggt, wie's Duurefiere vo unserem eigene Galaoobe im Rhypark und speeter im grosse Feschtsaal vo dr' Mäss. Au e' Meilestei in unserer Vereinsgschicht isch dr' Bau vom Guggekäller, wo mir im 1993, in dr Clarastrooss 46 hänn kenne uffmache.

Mittlerwyyl zelle mer 79 Aggtivi und sin natirlig e' Mannegugge bliibe. Noo 37 Johr kenne mer uff e' scheeni Zyt zruggluege und sin au e' weeneli Schtolz druff, was mer erreicht hänn.

Wenn jetz gluschtig worde bisch uff unseri muusikalische Qualitäte, denn loos doch emool in unseri Jubel-CD yyne.